தமிழீழ மக்கள் விடுதலைக் கழகத்தின் தலைவர்களில் ஒருவரும், அதன் அரசியல் பிரிவான ஜனநாயக மக்கள் விடுதலை முன்னணியின் சிரேஷ்ட உபதலைவரும், ஜனநாயகத் தமிழ் தேசியக் கூட்டணியின் செயலாளருமான வேலாயுதம் நல்லநாதர் ( முகநூலில் R Rahavan) அவர்களின் மறைவினை நண்பர் அலெக்ஸ் வர்மா முகநூலில் பகிர்ந்திருந்தார். அவர் தனது அஞ்சலிக் குறிப்பில் '42 வருடங்கள் போராட்டத்திற்கு தனது வாழ்வை பதின்ம வயதிலிருந்து தொடர்ச்சியாக அர்ப்பணித்த மனிதன் தன் மூச்சை இன்றுடன் நிறுத்தி, இன்று (22.2.2024) மாலை விடைபெற்றார்' என்று தெரிவித்திருந்தார். தன் வாழ்வை மக்களுக்காக அர்ப்பணித்து வாழ்ந்தவர்களில் ஒருவர் ஆர்.ஆர் என்றறியப்பட்ட வேலாயுதம் நல்லநாதர் அவர்கள். இவரது மறைவால் துயரில் ஆழ்ந்திருக்கும் அனவருக்கும் ஆழ்ந்த இரங்கல்.
இவர் என் முகநூல் நண்பர்களிலும் ஒருவர். அவ்வப்போது நான் இடும் பதிவுகளில் கலந்து கொண்டு எதிர்வினையாற்றுவார். தகவல்களைப் பகிர்ந்துகொள்வார். பிறந்தநாளன்று நீடூழி வாழ்கவென்று வாழ்த்துவார். தமிழீழ மக்கள் விடுதலைக்கழகத்தின் ஸ்தாபகரும், தலைவருமாகவிருந்த உமாமகேசுவரன் மீது மிகுந்த மதிப்பு கொண்டிருந்தவர். ஒரு முறை உமாமகேசுவரன் பற்றியொரு பதிவினையிட்டிருந்தபோது பின்வருமாறு எதிர்வினையாற்றியிருந்தார்:
"'நாம் பிறவிப்புரட்சியாளர்களல்லர்' என்றும் 'எமது சமூகத்தின் எச்சசொச்சங்கள் எங்களிலும் பிரதிபலித்துள்ளது' என்றும் கூறியிருந்தார். 83 இனக்கலவரத்தையடுத்து இயக்கங்கள் திடீரென வீங்கிப் பருத்ததன் விளைவுகளையும் பரிணாமமில்லாத வளர்ச்சியினால் நிலைமைகளை கையாளுந்திறன் போதியளவில் இருக்கவில்லை என்பதையும் கடைசிக்காலங்களில் மனந்திறந்து ஏற்றார். மண் விடுதலையல்ல, சமூகத்தின் ஒட்டுமொத்த விடுதலையை வேண்டியிருந்தார். அனைத்து முற்போக்கு சக்திகளுடனும் இணைந்து போராட நடைமுறையில் முயற்சித்தார்."
இன்னுமொரு தடவை கவிஞர் செல்வி பற்றிய பதிவொன்றில் காந்தியம் ஜீலி பற்றிக் குறிப்பிட்டபோது 'தோழி ஜூலி 1982லேயே காந்தீய செயற்பாட்டாளராக இருந்தார். 1983ல் வவுனியாவில் இடம்பெற்ற மேதின ஊர்வலத்தின்போது பொலிஸாரால் கடுமையாக தாக்கப்பட்டார்' என்ற தகவலைப் பகிர்ந்திருந்தார்.
இலங்கைத் தமிழர்தம் ஆயுதப்போராட்டத்தில் பங்கு பற்றி , தம் வாழ்வை அதற்காகவே அர்ப்பணித்து வாழ்ந்து வந்தவர்களில் ஒருவரிவர் பல்வேறு அமைப்புகளில் இணைந்து போராடிய இவரைப்போன்றவர்களின் பங்களிப்புகள் ஆவணப்படுத்தப்பட வேண்டும். ஆழ்ந்த இரங்கல்.
