ஆக்கிரமிப்பின் அங்கீகாரமும்  
அழிவின் மூர்க்கமும்
முடிசூடிக் கொண்ட யுத்த நுகத்தடியில்,
உறவின் இழப்பும்
இழப்பின் நினைவுகளை அழித்த
இனத்தின் மேலாதிக்கம்
இறுமாப்புக் கொள்ள,
நினைவுகளின் மீதான வன்முறை
உலக நுண்ணுயிருக்குமான
உரிமையை இழந்து விட்ட வேட்கை
உலகின் தெருக்களெங்கும்
கட்டுடைத்த கவனயீர்ப்பு
சுயமானத்தை பிரகடனபடுத்தி கொள்கிறது.

இனப்போருக்கு முன்னும் பின்னும்
இனப்பகைவர்களற்ற தெருக்களில்  
மரித்த எம்மினத்தவனுக்கு  
தாழ்த்தப்பட்டவனென பகைசூடி  
பிணம் செல்ல வீதித் தடையும்
தீண்டத் தகாதோனுக்கு தகன தடை கோரி நிற்கின்ற
விடுதலை மறவர் நாம்.
மாற்றான் அடக்கு முறை
மகா பாவம் என முழங்கி
இனத்துக்குள் அடக்குமுறையை  
பண்பாட்டு பாதுகாப்பு என
புறங்கையால் தள்ளிவிட்டு.
`புனித போர்´ எனக் கொக்கரித்து செரித்தனர்.
தாழ்வாரத்தின் கீழ் தேசியம் சேடமிழுக்க
யமனில்லாது செத்து மடிந்த சுடலையை
உயிர்த்தெழ வைத்துவிட  
சாதியெனும் கும்பகர்ணப் பெரும்பேயை
உதிர் முடிகட்டி
தெருவெங்கும் இழுத்து வரும்
பாழ்பாடியின் பெருங்குடிகள்.