பதிவுகள்; http://www.pathivukal.com

கனடாவிற்கு வயது 143

- மாலினி அரவிந்தன் -

கனடாவின் பிறந்த தினம் யூலை மாதம் முதலாம் திகதி ஒவ்வொரு வருடமும் கனடா தினமாகக் கொண்டாடப்படுகிறது. 143வது பிறந்த தினம் இவ்வருடமும் மிகவும் சிறப்பாகக் கொண்டாடப்பட்டது. 1867ம் ஆண்டு யூலை மாதம் வடஅமெரிக்காவில் உள்ள அனேகமான மாகாணங்கள் ஒன்றாகச் சேர்ந்ததால் கனடா என்ற நாடு உதயமானது. சென்றமாதம் யூன் 25, 26, 27ம் திகதிகளில் அனேகமான உலகத் தலைவர்கள் கனடாவில் நடந்த பு - 20 மகாநாட்டிற்காகக் கனடாவிற்கு வருகை தந்திருந்ததும் உங்களுக்கு நினைவிருக்கலாம்.

பிரித்தானிய இளவரசி எலிஸபெத் மகாராணியார் இவ்வருடமும் கனடாவிற்கு வருகை தந்திருக்கிறார். அவருடன் 89 வயதான இளவரசர் பிலிப்பும் வந்திருக்கிறார். கனடாவும் காமன்வெல்த் அங்கத்தவ நாடுகளில் ஒன்றாக இருப்பதால் மகாராணியாரின் வருகை பழமையைப் பேணும் பலருக்கு மகிழ்ச்சியைக் கொடுத்திருக்கிறது. யூலை மாதம் 7ம் திகதிவரை இவர்கள் இங்கே தங்கியிருப்பர். அநேகமாக பிரித்தானிய அரச குடும்பத்தினர் அவ்வப்போது கனடாவிற்கு வருகை தருவதுண்டு. சென்ற வருடம் இளவரசர் சாள்ஸ்சும் காமிலாவும் வருகை தந்திருந்தனர்.

கனடாவிற்கு வருகை தந்திருந்த பிரித்தானிய மகாராணியார் கனடாதினத்தில் மட்டுமல்ல, கனடிய கடற்படையின் நூற்றண்டு விழாவிலும் கலந்து கொண்டார். கலிபாக்ஸ்சில் உள்ள கனடிய கடற்படைத் துறைமுகத்திற்கும் மகாராணியார் விஜயம் செய்திருந்தார். துறைமுகத்தில் அணிவகுத்திருந்த கனடா, ஜக்கிய இராச்சியம், பிரான்ஸ், நோர்வே, பிரேசில், ஜெர்மனி, ஒல்லாந்து, டென்மார்க், அமெரிக்கா போன்ற நாடுகளின் கடற்படை கப்பல்களில் சீருடை அணிந்திருந்த கடற்படையினர் மகாராணியாருக்கு அணிவகுப்பு மரியாதை செலுத்தினர். பிரித்தானியாவில் இருந்து பல வருடங்களுக்கு முன்பு கனடா வாங்கியிருந்த, தற்போது பாவனையற்ற நிலையில் இருக்கும் நீர்மூழ்கிக் கப்பலையும் மகாராணியார் பார்வையிட்டார்.

பிரித்தானியாவில் இராணி மாளிகையில் காவலர்கள் கடமை மாறுவது போன்ற நிகழ்ச்சி கனடாவின் தலைநகரான ஒட்டாவாவில் உள்ள பாராளுமன்றத் திடலிலும் நடைபெற்றது. 84வயதான மகாராணியார், இதுவரை 22 தடவைகள் கனடாவிற்கு வருகை தந்திருக்கிறார். 1997ம் ஆண்டும் கனடாவின் பிறந்த தினக்கொண்டாட்டத்திற்காக உத்தியோக பூர்வமாக கனடா பாராளுமன்றத்திற்கு வந்திருந்தார். இம்முறையும் சினோபேட்ஸ் விமானங்கள் மேலாகப் பறந்து அணிவகுப்புச் செய்ய, 21 பீரங்கிக் குண்டுகள் வெடிக்க வைக்கப்பட்டு, முப்படையினரின் அணிவகுப்பு மரியாதையோடு மகாராணியார் கௌரவிக்கப்பட்டார். இந்த நிகழ்வில் மகாராணி சிகப்பு நிற ஆடை அணிந்து வெள்ளை நிறத்தில் தொப்பி போட்டிருந்தார். சுமார் 70,000 பேர் வரை ஒட்டாவா நிகழ்ச்சியில் கலந்து கொண்டனர்.

ஊரிலே தீபாவளி பண்டிகையின்போது எப்படி பட்டாசு, வாணவேடிக்கை எல்லாம் நடக்குமோ அதே போல கனடாவிலும் கனடா தினத்திலன்று இரவு வாணவேடிக்கை நடைபெறும். பாதுகாப்புக்கருதி வீடுகளில் பட்டாசு, வாணவேடிக்கைகளுக்கு அனுமதி கிடைப்பதில்லை. குறிப்பாக ரொறன்ரோவில் ஒன்ராறியோ வாவிக்கரையில் மிகப் பெரிய அளவில் இந்த வாணவேடிக்கை நடைபெறும். ஏரிக்கரை என்பதால் உல்லாசப் படகுகளில் இருந்து வானவேடிக்கையைப் பார்ப்பது மிகவும் அற்புதமாக இருக்கும். இந்த நிகழ்ச்சி எம்மவருக்கு முன்பு யாழ் முற்ற வெளியில் நடக்கும் தினகரன் விழாவின் வாணவேடிக்கையை அடிக்கடி நினைவில் கொண்டு வரும்.

கனடாவைப்போலவே, இலங்கையும் ஒரு காலத்தில் பிரித்தானியரின் ஆட்சிக்கு உட்பட்டிருந்ததால், எலிசபெத் மகாராணியார் 1954ம் ஆண்டு ஏப்ரல் மாதம் இலங்கைக்கும் விஜயம் செய்திருந்தது குறிப்பிடத்தக்கது. இலங்கை சுதந்திரம் பெற்று குடியரசாக மாறியதால் தற்போது காமன்வெல்த் அங்கத்தவர் பதவியை இழந்துவிட்டது.
கனடாவின் பல்லின மக்கள்

கோயில்களிலே அன்னதானம் கொடுப்பதுபோல இங்கேயும் கனடா தினத்திலன்று இலவச உணவு பரிமாறுவார்கள். பல்கலாச்சார மக்கள் இங்கே வாழ்வதால் பலவிதமான உணவு வகைகளும் இந்த விருந்துபசாரத்தின்போது இடம் பெறும். அவரவர் விரும்பிய உணவுகளை எடுத்துச் சாப்பிடுவர். கனடா தினத்திலன்று விடுமுறையாகையால் பல்கலாச்சார மக்களும் அந்த விடுமுறையை மகிழ்ச்சியோடு அனுபவிப்பர்.

kuruaravinthan@hotmail.com